Stórkostleg ferming

Falleg athöfn, skemmtileg myndataka, stórkostlegur matur og frábærir gestir. Við erum mjög snortin og alsæl með þennan óviðjafnanlega dag.

Þökkum fyrir samveru góðra vina og ættingja og fyrir fallegar kveðjur frá öðrum sem ekki gátu verið með okkur.

Við erum alveg örmagna og með hátt spennufall og þarafleiðandi verður ekki bloggað meira í dag. Hendum okkur í rúmið sæl og glöð. Myndir og upplýsingar koma á morgun.

Kristófer vill koma á framfæri þakklæti fyrir daginn - þetta var ómetanleg stund fyrir hann

Laugardagurinn til lukku

Pabbinn byrjaði á að drífa sig í Húsasmiðjuna til að kaupa rétta efnið á eldhúsgólfið. Það var bæs með hvítum lit - sem þarf endilega að taka langan tíma að þorna (24 klst) áður en það má lakka yfir það.
Jeppp, það var þá ekki eftir neinu að bíða að demba sér í að mála - hver stund dýrmæt !

Mamman er mikill reynslubolti í að mála og fannst pabbinn ekki alveg vera að gera rétt !!

Þannig að verkefna skiptingin var þannig að pabbinn fór fyrst vel yfir með bæsið í fúgurnar og mamman kom á eftir til að jafna út og fara síðustu bununa.

Eftir að gólfið var klárt var drifið í að versla eftir innkaupalista Ástu Hrannar fyrir ferminguna. Já einmitt - drifið í !!! Það þýddi lítið að drífa sig þegar allt var fullt af fólki allsstaðar að tæta og tæma úr hillum verslananna. Takið eftir fleirtala í verslun ! Þegar upp var staðið vorum við búin að fara í Jóa Fel, 2 Hagkaupsbúðir, 2 Bónusbúðir, Nóatún og 10-11. Þetta var sko ekkert grín - full vinna fyrir tvo í heilan eftirmiðdag - er þetta ekki magnað ?

Tommi þurfti að stökkva á síðasta rjómann í Bónus, tókum síðasta pítubrauðið, svo var leitað lengi að jurtarjóma - það er nefnilega ekki á hverjum degi sem maður kaupir hann ! Farið mjög varlega með marengsinn - þartil að konan við kassann missti einn í gólfið og brá helst við að mamman æpti upp yfir sig, hún var rosa snögg að hlaupa eftir nýjum marengs - það þýddi ekkert annað annars hefði þurft að gefa mömmunni áfallahjálp. Og hvað er með Rósmarín ? Finnst Reykvíkingum það allt í einu svona rosalega gott ? OK ef það var ekki til ferskt þá verður að hafa það - láttu okkur fá frosið - HA ekki heldur til ? Nú í versta falli þá tökum við bara krydd í dós - nei ég trúi því ekki - ekki til ein einasta krydd krukka af Rósmarín. Jæja ég segji nú ekki annað en verði ykkur að góðu með RÓSMARÍN steikina, salatið, kartöflurnar eða hvað það nú var sem Reykvíkingar voru að matreiða með þessu greinilega lang lang vinsælasta kryddi borgarinnar. Nú jæja er ekki til vanilludropar hér - allt í lagi maður - við förum bara í næstu búð......... svona hélt þetta ævintýri áfram í nokkra klukkutíma. Bíllinn belgdist alltaf meira og meira út og þegar komið var að búðarlokun var allt komið nema nokkrar mozzarellur.

Á meðan þessu ævintýri stóð komu mæðgurnar Jóhanna María, Telma og Unnur Ósk í heimsókn til Kristófers og ömmunar á Snekkjó. OOOoooo við erum ekkert smá spæld að hafa ekki hitt þær. En amman tók skemmtilegar myndir af heimsókninni:

Unnur Ósk fékk svona jóla/páska gjöf frá okkur
Umbro galla - vonandi passar hann


Unnur 'Osk man greinilega eftir Bjarti frá því í fyrrasumar. Hún er vön kattarkona því hún á hana Þumalínu Tár sem er aðeins yngri en Bjartur.
Hérna koma nokkrar dásamlegar myndir af Unni með Bjart.

Unnur Ósk og Kristófer eru góðir vinir - hún segist eiga hann !

Pabbinn sæll að vera kominn heim eftir velheppnaða verslunarferð.

Eftir matinn var baðinu breytt í eldhús og leirtauið vaskað upp. Það er jú að þorna blessað bæsið á eldhúsgólfinu. NB ! Mamman var með bala ofaní baðkarinu - sem var svo skolað sérstaklega vel til að eiga ekki á hættu að slikju af pastatómatsósu á skrokkinn í næsta baði.

HEI ! Ég dansa þá bara kattatangó á lyklaborðinu ef þú sýnir mér ekki athygli !

Kiki skemmti sér vel yfir myndashowinu sem á að sýna í fermingunni. Húkkit !

Það verður þá "seif" að sýna það án þess að fólk deyji úr leiðindum !

Pabbinn að tékka á tónlist í tölvunni fyrir fermingu og Kínaferð

Amman sívinnandi ! Nú var það síðasta umferðin af lakki á fatastandinn.

Jibbí ! Harpa verður sko ánægð með þetta fína rúm og stand í herberginu sínu.

Takk fyrir alla hjálpina amma okkar.

19.mars - enn einn annasami dagurinn

Vá þetta er búin að vera töff dagur - mikið að gerast. Svo mikið að ég ætla að nýta mér geispið og drífa mig í bólið. Bæti við fréttum á morgun.

Pakkinn frá Ítalíu kominn

Fjölskyldan á Ítalíu er nett stressuð á fermingunni hans Kristófers þeim finnst erfitt að geta ekki komið og hafa áhyggjur af því að maturinn verði ekki nógu góður.
Þeim létti nú aðeins held ég þegar mamman sagði að vinkona hennar Ásta Hrönn sem væri frábær kokkur og lærði líka heilmikið af Marcello ætlaði að halda veisluna. Samt langaði þeim að taka þátt í matnum þannig að Sara stakk uppá að senda ýmislegt til Íslands. Þannig að það varð úr að Betty fór í algjört maraþon að versla með Rebeccu og þurfti að flýta sér mikið til að koma pakkanum í póst. Kostaði alveg helling og ekki síst að senda svona þungan pakka. En þetta finnst þeim skipta miklu máli og auðvitað okkur líka. Kristófer er alveg í skýjunum því honum finnst maturinn vera absólút númer eitt í veislunni.
Það var búin að koma tilkynning um pakka daginn áður en mamman hélt að það væri myndavélin sem hún hafði pantað fyrir ömmuna. Þessvegna fór það svo að amman eltist við pakkann útí bæ og kom honum til okkar í Snekkjó. Betty var ákkúrat í símanum þegar Kristófer náði í pakkann og kom með hann inn - hún var virkilega glöð að hann hefði komið í dag og að heyra hversu Kiki var ánægður með sendinguna.

Vá þetta er ekkert smá magn og verður alveg svakalega gott að borða.

Undirbúningur á fullu

Það var nóg að gera í dag eins og fyrri daginn. Pabbinn þeyttist útum allan bæ til að nálgast slípivél til að taka gólfið í eldhúsinu í gegn. Þegar vélin var loksins kominn - tókst það ekki betur en svo að henni var snarlega skilað til baka. Pabbinn á eftir að finna útúr þessu !
Kiki tók til í öllu húsinu og vandaði sig sérstaklega - það átti nefnilega að vera hægt að sofa vel í nótt í góðu lofti. Einnig sagði hann að það væri ekki hægt að bjóða Hörpu upp á skít og drullu.
Mamman kláraði greinargerð um hversvegna við fluttum hingað í Snekkjó - ef svo skildi fara að við yrðum spurð í Kína hvernig stæði á mismunandi lögheimili núna og á pappírum sem þeir fengu. Svo var farið í IR til að vinna aðeins í afleysingarkennslu málunum.
Svo komu Ásta Hrönn og Álfheiður til að sjá Hörpu Hua Zi í fyrsta sinn og til að fara yfir planið vegna fermingarinnar. Það er svo sannarlega blessun að eiga svona vini, nú líður mömmunni mikið betur eftir að Ásta Hrönn sannfærði okkur um að þetta væri nú ekki mikið mál og nú skildi hún bara skipuleggja þetta þannig að við fengjum ákveðin verkefni - kaupa inn - þarna og þetta - allt vel skipulagt að hætti Ástu Hrannar. Já þetta verður bara spennandi.
Svo er Steinar Hugi búin að hafa samband útaf fermingar myndatökunni fyrir Kiki og Guðnýju og ætli við höfum hana ekki bara fyrir athöfnina. Það verður sko gaman að sjá myndirnar, vitum auðvitað að myndefnið er gott en svo erum við líka aðdáendur hans Steinars Huga - því hann tekur stórkostlegar myndir.

Fermingarskórnir

Nú er ein vika í fermingu Kristófers og stressið farið að segja til sín. Kiki og amman eru búin að vera veik undanfarna daga en ákváðu í dag að fara út og viðra sig svolítið.
Fóru fyrst í málningar leiðangur og keyptu ljós ljós bleikan lit á málninguna til að mála rúmið hennar Hörpu Hua Zi. Amman keypti líka þennan forláta flotta málningarpensil með xtra löngum hárum - annað eins hafði mamman bara aldrei séð. Þetta verður lang lang flottasta rúmið í Snekkjuvogi og þó víðar væri leitað.
Þau fóru svo í mikla leit að fermingarskóm í Kringlunni úr einni búð í aðra, þangað til Kiki sá í Skór.is þessa líka stórglæsilegu svörtu og hvítu skó. Sjá myndir fyrir neðan.
Þetta lýsir Kristófer vel - þegar hann er ánægður með eitthvað þá er hann strax viss og ekkert fær því breytt.
Mömmunni fannst þeir æði - köflótt fóður að innan og margir aðrir smart "díteilar". Ekki er það nú verra að þeir eru nr. 39 þannig að fljótlega fer Kristófer að vaxa uppúr þeim og þá getur mamman fengið að nota fermingarskóna hans Kiki !!!
Þau skelltu sér svo í bíó og fengu ís. Eftir að þau komu heim fór amman í að síkka buxurnar til að þær væru nú smart við nýju skóna. Hún sagði að allavegana hefði hún þurft að síkka um 5 cm - það er ca. vöxturinn á einu ári.
Það verður sko gaman að sjá fermingardrenginn þegar hann er kominn í öll fínu fötinn og með nýja klippingu.

ASUS er frábær fermingargjöf

Við Kiki erum búin að vera veik heima í dag, en hann hefur sem betur fer flotta tölvu sem við gáfum honum í fermingargjöf.

Það er sko búið að dunda sér heilmikið á henni, skrifa sögu, teikna Joe Boxer buxurnar sínar, skoða þætti og spila reikningsleik.

Á meðan Kiki var í tölvunni - leitaði mamman að myndum af honum frá því hann var lítill. Síðan tók við myndartaka af myndum !!!

Myndirnar verða síðan settar uppí Power Point til að geta sýnt þær í fermingarveislunni eftir rúma viku - nú fer að hefjast countdown !

Fermingargjafir

Krakkarnir okkar Kristófer og Guðný fengu nýju litlu ASUS tölvuna, flatskjá, utanáliggjandi harðan disk, hátalara og mús í fermingargjöf frá okkur Tomma og auk þess tóku amma Fríður og afi Trausti líka þátt í gjöfinni.
Þar sem Guðný var blessuð í dag og Kristófer verður ekki fermdur fyrr en 24. mars - annan í páskum var ákveðið að hann myndi fá að vita af sinni gjöf núna.
Myndirnar hér fyrir neðan sýna greinilega hversu ánægður hann varð þegar hann sá allar græjurnar.
Hef ekki myndir af Guðnýju með gjöfunum sínum en Kristófer sagði að hún hefði verið alveg svakalega ánægð með gjafirnar í veislunni.
Við erum svo glöð með að hafa hitt í mark !

Guð minn góður ! Hann trúir þessu ekki !

Vá ! Er þetta gjöfin mín ?

Flatskjár með silfur ramma í stíl við herbergið



Tommi að útskýra græjurnar



Kiki að máta litlu sætu tölvuna

Hér er verið að fara yfir allt efnið sem Tommi fékk hjá nemenda sínum, Baldri Fjölnis og Villa klippara vini okkar - kærar þakkir allir.

Það var sko hellingur af myndum, tónlist og þáttaröðum.

Krakkarnir koma til með að vera heillengi að skoða allt efnið.

Kiki fékk meira af strákaefni en Guðný stelpuþætti og svoleiðis

Hér er Tómas Jónsson Tæknifræðingur með Batchelor of Science gráðu að störfum !

Það tók töluverðan tíma að fara í gegnum allt efnið, flokka, hlaða inn og skipuleggja allt á diskana hjá krökkunum.

Þetta fannst Tomma sko ekki leiðinlegt.

Ársminning Marcello

Marcello pabbi Kristófers lést í bílslysi nú um rétt fyrir ári síðan, þ.e. 3.mars 2007. Í raun væri það dagurinn í dag ef ekki hefði verið hlaupársdagur í fyrradag.
Við byrjuðum á að fara í æskulýðsmessu í Langholtskirkju með ömmu Fríði, ömmu Dúdú og afa Trausta. Eftir fallega messu kveiktum við á kertum við altarið til minningar um Marcello - Kristófer raðaði þeim fallega uppí kross.
Á leiðinni heim komum við í bakarí og allir fóru svo heim á Snekkjó í flottan brunch. Þar á eftir fór afi heim en Kiki bað hann að koma með sér fyrst í Nexus til að kaupa fleiri Warhammer - fígúrur.

Við hin fórum yfir boðslistann fyrir ferminguna hans Kristófers á meðan og þegar Kiki kom heim var drifið í að gera boðskortin sem enn vantaði og setja þau í umslög. Það eru ca. 100 manns á boðslistanum - vonandi geta sem flestir mætt - vitum þó að kannski stendur illa á hjá fólki sem hefur planað eitthvað um páskana.

Kristófer var svo spenntur að byrja að mála fígúrurnar að þeir Tommi fóru í Húsasmiðjuna til að kaupa svart sprey sem grunn á fígúrurnar. Þeim var stillt uppá kassa útí garði og þar var spreyjað.

Við vorum búin að ákveða að fara í Fossvogskirkjugarðinn til að kveikja á kerti fyrir Marcello - það varð að dýrmætri stund á fallegum stað. Eftir það var ömmu Dúdú skutlað heim og síðan farið með ömmu Fríði á bílaverkstæðið hans Sigga - þar á Korandóinn aldeilis eftir að fá flotta yfirhalningu.

Við erum þakklát fyrir þennan dag og líður vel með að minnast Marcello á þennan hátt - hann hefur eflaust líka verið ánægður.

Kristófer sagði síðan frá því að hann og sr. Jón Helgi hefðuð verið búnir að ræða um að það væri sniðugt að fara út að borða á Rossopomodoro, þar sem Marcello vann sem lengst. Þangað förum við á morgun - þann 3. mars.

Fermingarkort Kristófers

Síðustu daga hafa mamman Kristófer og Bjartur verið á fullu að búa til fermingarboðskortin hans Kiki. Það má ekki seinna vænna því drengurinn á að fermast 24. mars á annan í páskum kl. 11 í Langholtskirkju.
Síðan verður boðið í veislu uppí Munaðarnesi - Kaffi Paradís hjá Ástu Hrönn vinkonu okkar.
Vonandi geta allir mætt okkur hlakkar mikið til og Kristófer sagði um daginn að það eina sem hann vildi að fólk mundi muna eftir væri að maturinn hefði verið góður og það hefði skemmt sér vel.
Við fjölskyldan og vinir ætlum að gera okkar besta til að standa undir þeim væntingum.

Bjartur taldi best að staðsetja sig á tölvunni og fylgjast þaðan með prentuninni

Kiki ábyrgðarfullur að skera niður myndirnar