3 mánuðir liðnir !

Tíminn líður aldeilis hratt, nú eru 3 mánuðir liðnir frá því að við sáum Hörpu Hua Zi í fyrsta sinn. Hún braggast aldeilis vel og það eru einhverjar framfarir á hverjum degi. Undanfarna daga vorum við í heimsókn í Munaðarnesi hjá Ástu Hrönn og Kristófer í aldeilis góðu yfirlæti - okkur leið eins og blóm í eggi. Það líklega sést á myndunum ..... er það ekki ? Svona á að lifa lífinu !

Mamman heldur uppá þessa mynd. Harpa var búin að læra að blása á biðukollur - að vísu hjálpaði vindurinn líka til en þetta var langtíma skemmtiefni og afþreying því það var nóg af biðukollum til í Munaðarnesinu.

Einfaldlega sætust.

Ásta Hrönn bauð okkur uppá jarðarber með rjóma í eftirmat - jarðarberin þekkti Harpa en hafði aldrei smakkað rjóma. Henni fannst hann alveg rosalega góður - mikil gourmet manneskja !

Kristófer tók þessa fínu mæðgna mynd - ætli við brosum ekki svona sætt afþví að hann var að taka myndina ?

Þennan svip hefur mamma aldrei séð áður !

Harpa fór í fyrsta sinn í heitan pott - aldrei farið í annað en litla balann sinn heima. Hún var fyrst í smá tíma óörugg en svo var hún alveg í skýjunum.

Sagði mér stundum ba ba (þýðir bra bra - þeir voru nefnilega ofaní pottinum) og benti á pottinn. Þetta þýddi þá að henni langaði að fara ofaní pottinn nú verður mamma bara að vera dugleg að fara í pottana í sundi eða vinna í því að fá heitan pott !

Harpa fyrir utan húsið "okkar" nr. 66 (fæðingarár mömmunar) í Munaðarnesi

Hér tók mín sig til og sýndi ótrúlega takta á píanóinu - amma hlustaði í andakt á konsertinn.

Harpa fékk rappara húfuna hans bróður síns lánaða - geðv. svöl !

Vinkonurnar Harpa Hua Zi og Ásta Hrönn á góðri stundu á pallinum í Munaðarnesi.

31.maí 2008 tveir mánuðir liðnir !

Það er ótrúlegt en satt að nú eru 2 mánuðir síðan ég fékk dóttur mína hana Hörpu Hua Zi í fangið í fyrsta sinn. Sú tilfinning var alveg ótrúlega mögnuð og ég fæ enn gæsahúð þegar ég hugsa til þess hvernig þetta var. Ég er svo óendanlega þakklát fyrir að hafa fengið þessa litlu stúlku og vera móðir hennar. Í Kína þurfti að skrifa uppá óhemjumarga pappíra um það að maður myndi aldrei yfirgefa hana eða koma illa fram við hana. Það mun ég svo sannarlega aldrei gera og ég mun alltaf vera til staðar fyrir hana.

Fyrsta snerting mín við Hörpu Hua Zi fyrir 2 mánuðum síðan.

Þeir mánuðir hafa liðið mjög hratt - eiginlega alltof hratt.

En verið alveg stórkostleg upplifun að kynnast þessari frábæru stelpu. Ég er svo heppin að vera mamma hennar og fengið að kynnast hvernig hún tekur framförum á hverjum einasta degi.

Hérna er Harpa Hua Zi skiljanlega ekkert sérstaklega ánægð. Hvernig gat það svosem verið ? Aldrei séð þessa manneskju fyrr !!

Þessi mynd var tekin fyrir nokkrum dögum.

Stórglæsileg stelpa sem mamman elskar útaf lífinu.


Nývöknuð og alveg rossssalega sæt.

Hárgreiðslustofa Hörpu Hua Zi

Eftir baðið í fyrrakvöld var mamman að dúlla við stelpuna sína og Harpa naut þess alveg í botn að láta greiða sér með burstanum. Ef mamman gerði sig líklega til að hætta þá setti hún hendurnar í hárið og rótaði - alveg eins og til að segja haltu áfram það er enn ekki búið að greiða allt hárið.

Mamman sá að Harpa var enn í svo miklu stuði og fannst svo gaman þegar verið var að greiða henni þannig að Dúdú dúkku var boðið í selskapinn.

Harpa sá strax að það þyrfti nú líka að gera eitthvað fyrir hana þannig að án umhugsunar var sett á fót hárgreiðslustofa Hörpu Hua Zi.

Svo hófst vinnan og sem betur fer náði mamman myndum af ferlinu frá a-ö.

Ætli hún hafi erft þessa eiginleika frá Astrid frænku og guðmóður sinni ?

Hvort má bjóða þér að fá greiðslu með bursta eða greiðu ?

Gott og vel þú ert hrifnari af greiðunni, þá getum við hafist handa.

Já það virðist vera allt í lagi með þessa greiðu. Það er ekkert að marka þó að mér finnist burstinn vera betri.

Heyrðu nú mig ! Forsendan fyrir því að þessi greiðsla heppnist vel er að Dúdú dúkkan hagi sér vel og sé kyrr á meðan.

Já maður verður dáldið pirró og þá verður maður bara að taka í Dúdú dúkku til að reisa hana við.

Kúnstin er að skiptingin sé rétt og toppurinn halli svona til hliðar.

Verið að leggja lokahönd á greiðsluna.

Sjáiði bara hvað maður er fagmannlegur - alveg eins og hún hafi ekki gert annað !!

Nú má taka mynd !

Bæði Harpa og Dúdú dúkka rosafínar með alveg eins greiðslu.

Núna var loksins hægt að fara í rúmið og sofa.

Kærar þakkir til þeirra sem hafa verið að skrifa komment hjá okkur í gestabókinni.

Heimsóknir hjá kínasystrum og nýr kerruvagn

Í dag er vika í fyrsta afmæli Hörpu Hua Zi og mikil spenna er að færast í mannskapinn á heimilinu. Hún sjálf veit samt minnst af þessu og á líklega ekkert eftir að kippa sér upp við það að eiga afmæli, nema þá helst að vera í stuði þegar fólkið kemur í heimsókn. Hún er svo mikið partýljón og er hrókur alls fagnaðar.
Foreldrarnir tóku aðeins forskot á sæluna með afmælisgjöf handa Hörpu Hua Zi það fannst nefnilega strax í kerru könnunarleiðangri ótrúlega flottur kerruvagn. Hann er extra langur - verður 130 cm og var sá síðasti og á góðum afslætti. Pabbinn varð samstundis yfir sig hrifinn og helst afþví að það er hægt að stilla handfangið alveg nógu hátt fyrir hann og svo eru torfæru hjól undir honum sem geta farið hvert sem er. Flottur dún kerru/svefnpoki var líka keyptur með því að hann var nógu langur fyrir kerruna og var greinilega svo obboðslega þægilegur. Semsagt búið að kaupa meiriháttar græju í afmælisgjöf sem á örugglega eftir að nýtast okkur vel næstu árin.

Eftir að hafa keypt kerruna þá var farið í prufugöngutúr og þá leið Hörpu svona líka obboðslega vel að hún steinsofnaði strax. Við ákváðum þá að spóka okkur dálítið um miðbæinn og áður en við vissum af vorum við komin inní vesturbæinn. Þá stakk Tommi uppá því að heimsækja kínasystur Hörpu og herbergisfélaga í sína fyrstu 10 mánuði - hana Þorbjörgu Önnu. Það var alveg frábært að hitta allar stelpurnar, Þorbjörgu Önnu, Margréti Eddu stóru systir og Ingibjörgu Önnu mömmuna. Við fengum rosafínt kínate og Harpa fékk gómsætan mat sem var búið að vera laga fyrir Þorbjörgu Önnu - gufusoðið grænmeti maukað með smjöri. Þessi matur rann svo ljúflega ofaní Hörpu að foreldrarnir drifu sig daginn eftir í IKEA þar sem fest var kaup á góðum potti með græju til að setja ofaní til að gufusjóða matinn. Við fengum líka fleiri frábær tips frá Ingibjörgu t.d. hafði Þorbjörg Anna tekið snuð sem hún var greinilega mjög ánægð með, það kom í ljós að þetta var tegund sem mamman hafði ekki keypt (samt búin að kaupa nokkrar) þetta snuð hefur styttri túttu en önnur sem eru vinsæl á markaðnum. Þannig að það var líka brunað eftir svona snuði sem fæst í Lyf og heilsu og heita BIBI snuð. Harpa er smám saman að fá meiri áhuga á snuðinu og hefur tottað það smávegis af og til - það er meira en hún gerði við hin það var í mesta lagi hægt að leika sér með þau. Það var semsagt bæði gagn og gaman af þessari heimsókn.
Eftir að hafa séð eina kínasysturina og horft á hvað hún hafði tekið miklum framförum þá langaði okkur líka að heimsækja Erlu Sif þannig að við hringdum á laugardaginn (Tommi ætlaði fyrst bara að bruna af stað og droppa inn !) og spurðum hvort þau yrðu heima ? Brynjar sagði að þau yrðu heima en nú væri verið að fara að skíra. Þannig að það var eins gott að við æddum ekki af stað ! Okkur var hinsvegar boðið í afganga á sunnudeginum - sem reyndar kom svo í ljós að voru engir venjulegir afgangar !!! Heil banana terta, brauðterta með skinku og bacon og svo önnur brauð/samloku "terta" með sólþurrkuðum tómötum, salati, pesto og einhverju öðru gómsætu. Namm namm eins og liltu stelpurnar segja - já ég fæ sko vatn í munninn bara að skrifa um þetta og rifja upp veitingarnar. Já við ekkert smá heppinn að koma svona í annan í skírnarveislu. Þessi heimsókn var líka svona yndislega skemmtileg eins og hin. Það er líka eflaust sterkar tilfinningar til stelpnana því að við upplifðum "fæðinguna" sameiginlega og kynntumst þeim svo vel úti í Kína. Þennan stóra þátt í lífi okkar eigum við sameiginlegan en svo eru þær samt svo ólíkar allar að það kemur til með að vera áhugavert að sjá hvernig þær þroskast. Við erum ekkert síður stolt yfir þeirra framförum en hennar Hörpu. Það verður gaman að fylgjast með þessum stelpum í framtíðinni - hvað sem þær munu nú gera.

Erla Sif nýskírð ! Hún er 2 mánuðum yngri en Harpa en samt orðin svona stór og myndarleg. Þar að auki er hún komin með margar tennur í efri og neðri góm á meðan Harpa okkar er bara með 2 vinnukonur (eins og amma Dúdú segir) í neðri góm.

Tommi vildi aðeins fá að halda á Erlu Sif en henni leist ekkert sérstaklega vel á það.

Pabbarnir víxluðu stelpunum ! Harpa var nú mest hissa á því að Brynjar héldi á henni en svo fannst henni best að koma til pabba síns.

Já það er best að vera þar sem maður þekkir best til - það er nú líka góðs viti að þeim finnist það.

Þarna eru þær að hlusta á Andreu segja eitthvað.



Þarna leynir forvitnin sér ekki !
Það sést greinilega hversu ólíkar þær eru - Erla Sif svona ljós á hörund (eins og kínverjarnir vilja helst vera) og með miklu meira og dekkra hár en Harpa Hua Zi.

Þegar mamman tók þessa mynd í dag í labbitúrnum þá langaði henni helst til að stökkva ofaní pokann til Hörpu og kúra með henni. Það er svo greinilega gott að lúlla í þessum poka í nýja kerruvagninum.

Pabbinn að vígja kerruvagninn heima í hverfinu okkar - vorum á leið í Blómaval og Húsasmiðjuna. Hörpu finnst svo gaman að fara þangað - margir litir, falleg blóm og fiskarnir eru í miklu uppáhaldi.

Harpa alveg dúðuð en líður greinilega vel. Hún er þarna með BIBI snuðið (sem Ingibjörg sagði okkur frá) sem hún japplaði á öðru hverju, Landsbanka fígúruna sem konurnar í aðalútibúinu vildu endilega gefa henni + sundbolta. Þær voru svo skotnar í henni og komu sérstaklega fram til að kíkja á hana meðan foreldrarnir voru að reyna að koma fjárhagsmálunum á réttan kjöl. Allt of mikil útgjöld og m.a. dýr ferðin til Kína hefur komið slagsíðu á útgjöld heimilisins. Nú verður sultarólin hert og borðað meira af hafragraut - er nú borðað þegar í morgunmat og stundum í hádeginu !!!!

Harpa var nú ekki alveg strax sátt við kerruvagninn !

Kannski líka vegna þess að pabbinn var búin að reyra hana niður í beltið - honum fannst það alveg magnað - 5 punkta belti - það gerist bara ekki betra !!!

Hérna er konan í búðinni að skipta um dekk - hitt var gallað hélt engu lofti sama hvað var pumpað í það.

Cosý og afslappað andrúmsloft hjá stelpunum, Þorbjörgu Önnu, Margréti Eddu stóra systir(nýklippt og fín)og Ingibjörgu Önnu mömmunni. Pabbinn liggur þarna á gólfinu með Hörpu (það rétt glittir í hana).

Þorbjörg Anna að sýna dótið og Harpa Hua Zi fylgjist með.

Það var líka nýbúið að skíra á þessu heimili. Við munum bíða enn um sinn með að skíra - látum afmælisveisluna duga í bili.

Það var alveg magnað að sjá stelpurnar í svona álíka fötum - það var eins og þetta hefði verið skipulegt svona - en nei aldeilis ekki - bara "pjúra" tilviljun.

Rautt og röndótt það er málið.

Þarna er Þorbjörg Anna með BIBI snuðið sitt - alveg hæstánægð.

Það er ótrúlegt hvað þessi litla stelpa er liðug - hún hefur ekkert fyrir því að liggja svona. Hún gæti auðveldlega orðið fimleikastjarna.

Gjöf frá stóra bróður

Mamman fór á randið með krakkana sína í dag m.a. í Smáratorg þar skokkaði Kristófer inní Toys R us búðina og keypti gjöf handa litlu systur sinni.

Hann valdi þessa líka fínu sætu dúkku en vissi ekkert að það þyrfti að skoða fyrir hvaða aldur þetta væri ætlað. Mamman hafði áhyggjur að þetta væru svo smáir hlutir þannig að það væri ekki hægt að láta Hörpu fá þetta EN aldeilis óþarfa áhyggjur !!!

Harpa Hua Zi leysti málið farsællega sjálf því hún var yfir sig hrifinn af dótinu eins og það kom fyrir í umbúðunum það mátti ekki einu sinni taka þetta af henni augnablik á meðan var verið að koma henni fyrir í bílstólnum.

Svo þegar Harpa stækkar þá getur hún opnað þetta og leikið sér með litla dótið.

Það er sem ég segi - ekki vera gera úlfalda úr mýflugu - flest er hægt að leysa farsællega - þó að maður komi ekki auga á það samstundis.

Takk elsku Kristófer fyrir að hugsa hlýtt til Hörpu.

Skríða, standa, feluleikur, skápar, lúlla, útivera

Miklar framfarir hafa verið á hverjum degi í getu og þroska hjá Hörpu og mömmunni finnst hún varla hafa við að nótera allt hjá sér sem litla stúlkan er að gera.

Reyni að halda þessu bloggi gangandi til þess að það verði heimild um Hörpu Hua Zi þegar lengur líður frá og minnið farið að skolast til. Hér eru nokkur atriði sem hafa gerst á síðustu dögum:

Mamman byrjar alltaf á að ná í blöðin á morgnana og gá til veðurs og auðvitað er maður búin að læra það líka, bíddu bara mamma ég skal bara segja þér hvernig veðrið er !

..

ÚTIVERA

Við mæðgurnar fórum í grasagarðinn til að dást að fallegu blómunum og trjánum sem eru í blóma. Það var dáldið hráslagalegt og nebbinn varð rauður en sem betur fer var maður í góðu hlýju úlpunni sem amma Fríður gaf Hörpu.

Blómunum var líka sýndur áhugi - hún er svo mikill fagurkeri þessi stelpa

Þarna voru sko margir skrítnir fuglar ! Hörpu fannst þó merkilegast að þeir hefðu áhuga á brauðmolunum hennar.

Bjartur kisan okkar er greinilega uppáhalds dýrið það er skríkt og hlegið þegar hann er nálægt.

Nývöknuð ! Þetta er ein af uppáhaldsmyndum mömmunar

Hm ! Ég verð að fylgjast vel með hvað þau eru að gera þarna í garðinum

Egill og Kristófer duglegir vinnumenn í garðvinnu

Auðvitað get ég líka hjálpað til - ég sá hvernig mamma gerði þetta áðan.

..

LÚLLA

Ég sef stundum úti í vagninum en annars tek ég mér bara mína kríu þegar ég er orðin þreytt.

Je dúdda mía ! Mömmunni finnst ég alveg guðdómlega sæt á þessari mynd.

Ég svaf svo fast að ég tók ekkert eftir því að það væri verið að opna og loka hurðirnar á bílnum. Læt það sko ekki trufla mig.

Mikið óskaplega er maður falleg og friðsæl svona sofandi

..

Í VINNUNNI HJÁ MÖMMU

Fínt að naga hringluna á meðan mamma er að vinna

Erlingur er voða hrifinn af mér og tók mig rétt á meðan mamma gekk frá dótinu sínu

Það var nú mestallan tíman eins og stóísk ró yfir mér

Æ hérna er ég að verða dálítið þreytt á að vera hjá mömmu í vinnunni.

..

SKÚFFUR

Hei mamma ! Alltaf verið að athuga hvað maður megi gera og hvað ekki !

..

SKRÍÐA

Svona set ég mig í stellingar áður en skriðhlaupið hefst.

Ready steady and go ! Það er ekki hægt að segja annað en hún hafi sérstakan skriðstíl en aðalatriðið hjá henni er að komast á milli áfangastaða. Hún er orðin alveg ótrúlega fljót að komast þangað sem hún ætlar sér.

Það er gripið í skúffu höldurnar til að standa upp en sem betur fer er maður ekki enn búin að fatta hvernig eigi að draga skúffurnar út.

..

SKÁPAR

Svipurinn kemur uppum hana ! Æ mamma ég ætla bara aðeins að kíkja !

Þetta var í annað sinn sem hún opnar skápinn. Hún lítur á mömmuna og veit vel að það er búið að segja nei nei þetta má ekki.

Svona hófst skápaævintýrið - hún var að kanna umhverfið og hurðin var sérstaklega spennandi en svo allt í einu tók hún eftir að skápurinn var ekki lokaður !!!

Hm ! Bíddu nú við - hvað er hér ?

Já há þetta er athyglisvert og miklu meira spennó að sjá hvað er bakvið þessar hurðar. Þarna er sko heilmargt sem væri gaman að gramsa í - ef ég fengi nú bara frið til þess !

..

FELULEIKUR

Hér er verið að undirbúa leikinn.

Nú er ég týnd - hvar er Harpa Hua Zi ?

Viskustykkið var líka sett á hausinn á mömmunni og það var ekkert smá fjör að taka það aftur niður. Við skemmtum okkur alveg stórkostlega vel - eins og sést.

Gjugg hér er ég

Hvar er Harpa ? Svo er þessi leikur endurtekinn aftur og aftur - alltaf jafn skemmtilegur.

..

STANDA

Stend við baðið og gef í skyn að ég vilji fara í bað

Stend líka upp í baðinu - er alls ekki smeyk - sleppti meira að segja annarri hendinni.

Auðvitað er mamman ekki langt undan og tilbúin að grípa í mig

Mamman hefur varla kveikt á sjónvarpi frá því við komum frá Kína þannig að það var nú eitthvað sem Harpa varð að skoða nær þegar hún sá það í gangi.

Stóri bróðir að passa mig - honum finnst þetta ganga heldur bratt !

Farin að skríða hratt á milli herbergja og standa alls staðar upp við allt.

Spenningurinn leynir sér ekki - nú á það sko að takast !

'Eg skal ná að standa upp sjálf.

Það er aðeins auðveldara að standa upp í hjónarúminu því hún er búin að finna raufina á milli dýnana þar sem hún getur sett fæturnar og það gefur henni aukin stuðning

Þurfti rétt aðeins að halda í mömmu sína en samt rosalega stolt að hafa getað staðið upp sjálf